ازاى الشركات بتعين للوظائف الشاغرة عندها وازاى معظمنا بيدور على شغل بالطريقة الخطأ ؟

الاغلبية العظمى مننا لما بييجى يدور على شغل بيقعد يدور على اعلانات الوظائف فى الجرائد ومواقع التوظيف وعلى ال Facebookبس 20% بس من الوظائف المتاحة فى الشركات هى اللى بيتعلن عنها اصلا فى الوسائل دى !!

How Companies Fill Jobs

الشركات عندها طرق مختلفة تملى بيها الوظائف الشاغرة عندها ومعظمنا ميعرفهاش او ميعرفش ازاى يستغلها ،

الطرق دى كالأتى وزى ما موضح فى الصورة :-

1- اول حاجة بتفكر فيها الشركة لما تحتاج تعين حد فى وظيفة شاغرة هى مين من جوا الشركة نفسها ينفع يتنقل فى الوظيفة دى ويقوم بيها او يشيل شغلها جمب شغله وده اسمه التعيين الداخلى منهم فيهم يعنى .

2- ثانى طريقة لو مفيش حد جوا الشركة يقدر يتنقل او يشتغل الوظيفة دى يبتدوا يبلغوا الموظفين جوا الشركة لو حد فيهم يعرف حد كويس ومؤهل نقدر نجيبه على طول فى الوظيفة دى اختصارا للوقت اللى ممكن يضيع لو عملنا اعلان ونعمل مقابلات ووجع دماغ و فلوس و دى بيسموها Referrals او علاقات يعنى والتطبيق الغلط ليها بيسمى "واسطة" وده معروف عندنا فى مصر جدااا بس هقولك ازاى تتغلب عليه.

3- ثالث طريقة انهم لو بردو ملقوش حد كويس يبتدوا يدوروا فى قاعدة البيانات بتاعتهم اللى مليانة C.Vs ويشوفوا مين قدم قبل كده وعندهم بياناته ويكلموه لو هو لسة مهتم بالشغل عندهم وبالوظيفة.

4- لو كل الطرق دى مجبتش حد كويس بيضطروا فى الاخر يعملوا اعلان توظيف وده بيحصل بس على %20 من الوظائف اما الباقى محدش بيعرف انه موجود اصلا ود مصطلح اسمه The Hidden Job Market

بمعنى ان فى كم كبير جداً من الفرص والوظائف المتاحة موجود جوا الشركات بس بتطير قبل ما حضرتك تعرف انها موجودة اصلا عشان انت بس بتستنى اللى يجيلك فى اعلان وظيفة او اللى تلاقيه وقع قدامك بس !!

حاول تدور على شغل بطريقة مختلفة ومميزة لان ال %20 اللى ظاهرين قدامك كل الناس بتتخانق عليهم مع ان فى 80 % موجودين بس الشاطر هو اللى يعرف يوصلهم.

استنوا مقالنا القادم عن ازاى تبقى Active Job Seekerو توصل للفرص اللى محدش يعرف عنها حاجة بطرق مختلفة ومميزة وازاى تتغلب على فكرة الواسطة فى الشغل.